प्रिय मूल्यवान् शेयर सदस्यज्यूहरू तथा सहकारी अभियानका शुभेच्छुक महानुभावहरू,
प्रतिष्ठित जनसचेतना बचत तथा ऋण सहकारी संस्था लिमिटेड (Janasachetan SACCOS) को नेतृत्व गर्ने महत्वपूर्ण जिम्मेवारी प्राप्त हुनु मेरो लागि अत्यन्तै सम्मान र गौरवको विषय हो।
यस यात्रामा प्रत्यक्ष तथा अप्रत्यक्ष रूपमा साथ, सहयोग, विश्वास र हौसला प्रदान गर्नुहुने सम्पूर्ण आदरणीय शेयर सदस्यज्यूहरू, शुभेच्छुकहरू तथा सहकर्मीहरूप्रति म हार्दिक आभार तथा कृतज्ञता व्यक्त गर्दछु।
हामी सदस्यहरूले राख्नुभएको कुनै पनि जायज आवश्यकता, अपेक्षा र हितलाई अधुरो वा अपूरो राख्ने छैनौँ। संस्थाको स्थापना र विकासका क्रममा तय गरिएको साझा उद्देश्य, मूल्य, मान्यता र सदस्य हितको मूल भावना भन्दा बाहिर गएर कुनै व्यक्तिगत स्वार्थ वा हितलाई प्राथमिकता दिइने छैन।
सुशासनका सवालमा हामी कुनै पनि प्रकारको सम्झौता गर्ने छैनौँ। पारदर्शिता, प्रचलित कानून तथा नियमनको पूर्ण पालना, जवाफदेहिता, समानता तथा समतामूलक व्यवहार, वित्तीय अनुशासन र प्रभावकारी वित्तीय तथा गैर-वित्तीय प्रशासन जस्ता सुशासनका मूलभूत सिद्धान्तहरूलाई व्यवहारमै लागू गर्दै अगाडि बढ्नेछौँ।
हामी सामूहिक कार्य, लोकतान्त्रिक अभ्यास, आपसी विश्वास र जिम्मेवार नेतृत्व मा दृढ विश्वास गर्दछौँ। हाम्रो टिमवर्क, संस्थाप्रतिको निष्ठा र सदस्यहरूप्रतिको ट्रस्टीशिपले आजको अवस्थाबाट अझ सुदृढ र समुन्नत अवस्थातर्फ अघि बढ्न हामीलाई प्रेरित गर्नेछ।
सहकारी तथा क्रेडिट युनियनका अन्तर्राष्ट्रिय सिद्धान्त, मूल्य, मान्यता, सफल अभ्यास तथा सदस्यकेन्द्रित सहकारी संस्कृतिलाई मार्गदर्शनका रूपमा आत्मसात् गर्दै संस्थाको विनियम तथा दीर्घकालीन लक्ष्यअनुसार निर्धारित उद्देश्य र लक्ष्यहरू हासिल गर्न प्रतिबद्ध रहनेछौँ।
हाम्रो मुख्य व्यवसाय र सम्पूर्ण गतिविधिको केन्द्रबिन्दु शेयर सदस्य हुनेछन्। सदस्यको आर्थिक तथा सामाजिक हित, संस्थाको दिगो विकास र दिगो विकासका लक्ष्यहरू (SDGs) लाई ध्यानमा राख्दै दीर्घकालीन रूपमा सुरक्षित, सक्षम र दिगो संस्था निर्माण गर्ने हाम्रो प्राथमिकता हुनेछ।
संस्थामा देखिन सक्ने कुनै पनि कमजोरी, कमी-कमजोरी वा प्रक्रियागत त्रुटिहरूलाई सदस्यहरूसँगको निरन्तर संवाद, अनुभवी अग्रजहरू तथा सहकारी अभियानका विज्ञहरूको सुझाव र मार्गदर्शनमार्फत सुधार गर्दै जानेछौँ।
यस अवसरमा सम्पूर्ण आदरणीय शेयर सदस्यज्यूहरूलाई विशेष अनुरोध गर्दछु—संस्थासम्बन्धी कुनै पनि भ्रम, अन्योल, शंका वा गलत धारणा उत्पन्न भएमा अपुष्ट कुरा वा हल्लाको पछि नलागी सिधै संस्थामा सम्पर्क गरी वास्तविक जानकारी लिनुहोस्। कुनै पनि विषयमा स्पष्टता आवश्यक भएमा हामीसँग प्रत्यक्ष संवाद गर्न सदैव स्वागत छ।
संस्थाको हित, सदस्यको हित र सहकारी अभियानको सुदृढीकरणका लागि प्राप्त हुने रचनात्मक सुझाव, स्वस्थ आलोचना तथा सकारात्मक प्रतिक्रियालाई हामी सदैव उच्च सम्मानका साथ ग्रहण गर्नेछौँ।
तपाईंहरूको विश्वास, साथ र सहयोग नै हाम्रो सबैभन्दा ठूलो शक्ति हो।
धन्यवाद।
जय सहकारी!
जय जनसचेतना!
